… * عالم فروحه * …

تذكرون هذا البوست إللي مرة كنت متحمسة فيه
كانت اول مريضة أكشف عليها في حياتي المهنية
طبعا كنت ناوية أقولكم السالفة
بس انشغلت والحين جا وقتها
أوكي

أول عيادة كانت عندي في مادة تشخيص أمراض الفم
Oral Diagnosis
أكيد عشاننا طلاب جاهلين فقالوا تبدون بالكشف البسيط بدون شغل
بس آخذ التاريخ المرضي للمريضة
وأكشف على أسنانها وأقول هنا في سوس وهنا يحتاج تنظيف وكذا
بس المشكلة في كليتنا المصونة ( الله يحفظها ) النظام هو إن إحنا إللي ندق على المريضات وندور مريضات
يعني الكلية ما توفرلي مريضات أنا إللي أوفر
وإذا ما لقيت.. عاد أندب حظي وأضيع وقت عيادة عالفاضي

المهم
الكلام هذا ( حق أول مريضة ) المفروض يكون اول أربعاء بعد إجازة رمضان
طبعا أنا خفت وقلت أأجلها لثاني أسبوع عشان أشوف البنات وش رح يسوون
المهم شفت وش المفروض يصير وإرتحت شوي وقلت يا بت إنتي قدها وقدود

المهم
يوم السبت من الأسبوع الثاني دقيت على المريضة
ألو فلانة
إيوة
معاكي الدكتورة فرح من كلية طب الأسنان وموعدك رح يكون يوم الأربعاء إن شاء الله
الساعة 10 الصباح لا تتأخري
أكيد دكتورة ما رح أتأخر والله يجزاكي ألف خير

طبعا أنا سويت إحطياطاتي ودقيت على كل مريضاتي في رمضان عشان أتأكد إن الأرقام صحيحة
( هذي قصة ثانية بعدين أقولكم عليها )

طيب مشت الأيام وجا يوم الثلاثاء
كل صديقاتي قالوا بيدقون على مريضاتهم عشان يتأكدون مية بالمية إنهم جايين
وطبعا بعد نصايح ممن سبقونا إننا لازم نجري ورا المريضة عشان تجي
فأنا قلت طيب ودقيت
ألو فلانة معاكي الدكتورة فرح
إيوة يا دكتورة كويس إنك اتصلتي
(أنا بصدمة) ليش في شي؟؟ ما رح تجي؟؟؟
لا يا دكتورة أنا جاية بس كنت بأتأكد الساعة كم الموعد؟
الساعة 10 ولا تتأخري
حاضر إن شاء الله أكون عندك قبل 10 كمان
طيب كويس

أشوا إني دقيت
طبعا محسوبتكم اتطمنت لأن المرضية كانت متحمسة لأبعد درجة

وجا يوم الأربعاء
أخذنا المحاضرة في أمان الله وسلامه
وبعدها رحنا للعيادات
وأجهز عيادتي وألبس العازل الأصفر والقفازات أم بودرة وريحة شينة
وأروح لغرف الإنتظار وأنادي على المريضة
فلانة؟؟؟
لا رد
الغرفة الثانية
فلانة؟؟؟
لا رد
نزلت الغرفة إللي تحت
فلانة؟؟؟؟؟
نظرات من المريضات ولا رد

طالعت الساعة كانت 11 إلا عشر
قلت يا بنت اصبري يمكن الطريق زحمة وإلا شي

طبعا أنا كنت دقيت على الرقم الثابت إللي في ملف المريضة

وصبرت وصبرت
لين صارت 11 وربع
والعيادة تخلص الساعة 12
وأنا في قمة توتري
المريضة ما جت
!!!!!!!!

وأنا في حرقة أعصابي واقفة عند الدرج أنتظر وأشتكي لكل وحدة تمر وأعرفها إن مريضتي ما جت
تجيني حرمة تقولي
دكتورة
إلتفت مفجوعة أنا؟
إيوة دكتورة ممكن تعالجيني؟
إيش عندك؟ ( طبعا مسوية الدكتورة وأنا ما أدري وين ربي حاطني فيه ) قولي إيش عندك؟
والله أنا جيت وسويت كشف اليوم وأبغى أسوي أسناني
كيف يعني تسوي أسنانك؟ حشوة؟ عصب؟ تركيبة؟
والله ما أدري يا دكتورة
طيب دقيقة أشوف

طالعت فيها وأقول لنفسي أكيد مريضتي حتجي وما أبغى أوعد الآدمية هادي بشي وبعيد يصير فشوش
لقيت وحدة من البنات مارة قمت قلتلها تبغي مريضة؟
قالت لأ مريضتي وصلت المواقف بأستناها

رجعت للحرمة وقلتلها والله مافي أحد يسويلك تعالي بكرة أو استني لبعد الظهر
حسيتها زعلت بس من جد ما عرفت إيش أسوياه وقتها وأنا قلبي مع الآدمية إللي ما جات

المهم
مسكت الملف ولقيت رقم جوال قلت يا بنت دقي شوفي هيا فين
دقيت
توت توت توت
ألو
صوت رجال!!!! ألوووو
إيوة ألو لو سمحت هذا مو جوال فلانة
لا بس أنا زوجها
(ممتاز) طيب معاك الدكتورة فرح من كلية طب الأسنان.. هيا زوجتك عندها موعد اليوم
إيوه يا دكتورة عندها موعد اليوم
طيب بس هيا ما جات
وي أجل فين راحت؟؟؟
!!!!!!!!!!!!!!!!!!!!!!!!!!!!!!!!!!
( إيش إللي فين راحت وأنا إيش دراني عن مرتك ) والله ما أدري يا عم بس هيا ما جات
طيب أنا أشوف هيا فين وأرجعي دقي عليا
وقفل السماعة بوجهي

طبعا انا دوروووووووني إيش إللي فين راحت

المهم بعد شويه كذا رجعت دقيت
إيوة يا دكتورة هيا المفروض كانت تجيكي بس ضاعت في الطريق
(هاه؟؟؟؟) ضاعت؟
إيوة أصل السواق جديد وما يعرف المستشفى حقتكم وهيا ما تدل كويس
خلاص غيريلها الموعد وأنا أجيبها بنفسي

طبعا انا عصبت إيش إللي على كيفهم يعني يدري إنو سواق جديد وهيا ما تعرف تدل
قمت قلتله بصوتي الصارم الدكتوري ( زي ما أحب أسميه ) أشوف بس يمكن يتاخر زيادة لانو زحمة عندنا
الله يجزاكي خير يا دكتورة
وإن شاء الله ما تتأخر المرة الجية
وقفلنا

أنا حسيت نفسي شريرة شوية بس إيش أسوي من القهر
المهم أطالع الساعة 11 ونص
وقلت هيا ما يعدي اليوم إلا وأنا كاشفة على مريضة
طالعت حولي وألاقي ديك الحرمة
قلت بسسسسسسسسسس لقيتها

لوسمحتي
إيوة يا دكتورة
لقيتي أحد يعالجك
لا والله قالولي تعالي بعد الظهر
طيب هاتي رقم ملفك وأنا أشوف إيش ممكن أسويلك اليوم

طبعا في قاعدة عندنا.. عمرك ما تحسس المريض أو المريضة إنه أول واحد وإلا ما رح يرضى
ولا تحسس المريض إنك محتاجه وإلا رح يستغلك إستغلال شنيع

المهم بسرعة بسرعة جبت الملف وطيرااااااان عالعيادة
وسويت لها كشف وكمل البيانات وكل شي
وخلصت بالضبط الساعة 12 وربع

طلعت المريضة من العيادة
وأنا تنفست الصعداء
طبعا ما أوصفلكم كمية التوتر إللي كنت فيها
يا ساتر
بس الحمد لله عدت على خير وشفت مريضات كثير بعدها

بس السالفة ما خلصت
وأنا قاعدة أنظف العيادة
فجأة أسمع البنات يدورون علي
فرح فرح
في وحدة تبغاكي
؟؟؟؟؟؟؟؟؟
مين تبغاني؟
وحدة
طيب جيبوها
جت لين عندي
إنتي الدكتورة فرح؟
إيوة أنا

أنا فلانة
!!!!!!!!!!!!!!!!!!!!!!

كان نفسي أقولها صباح الخير بس حزنت عليها

والله أنا آسفة يا دكتورة بس السواق ما يعرف الطرق
وما أدري إيش
وأنا أسمع من جهة وأطلع من جهة عشان ما أطلع حري فيها
ويا دكتورة انا مرة أبغى أسوي أسناني الله يخليكي
وبدأت تترجاني إلا شوية

طيب طيب أسويلك موعد بس ما أدري متى
أشوف وأقولك
طيب
طيب يا دكتورة الله يجزاكي خير ويوفقك يا رب
آمين
طيب مع السلامة
مع السلامة

مشت وأنا واقفة
مرة كان إحساس غريب إن وحدة قد أمي أو أصغر شوي تترجاني إلا شوية أسويلها أسنانها
إحساس كان جدا شيء وحلو في نفس الوقت
السيء إني حزنت عليها إنها عارفة إني انا طالبة ولسه بأدرس وترضى إنها تترجاني أسويلها
يعني بالعربي تثق فيني
مرررة شي يخوف
والإحساس الحلو إني صرت أقدر أساعد وأسوي شي.. يعني لما أسوي حشوة لسن كأن يؤلم المريضة أو أسوي حشوة لسن أمامي شكله كان مشوه
مرة شي حلووووو

بس من جد اول مريضة
مغامرة
هههههههههههههههههههههههه

وإلى مغامرة أخرى لفروحه في كلية طب الأسنان

تعقيب | ردود RSS